అమెరికాలో గ్రీన్ కార్డ్ ఉంటే జీవితాంతం భద్రత అని చాలామంది భావిస్తుంటారు. ఒకసారి గ్రీన్ కార్డ్ వచ్చిందంటే అమెరికాలో శాశ్వతంగా ఉండొచ్చని అనుకుంటారు. కానీ తాజాగా అమెరికా సుప్రీంకోర్టు ఇచ్చిన తీర్పు ప్రపంచవ్యాప్తంగా ఉన్న లక్షలాది మంది గ్రీన్ కార్డ్ హోల్డర్లలో ఆందోళన రేకెత్తిస్తోంది.

అమెరికా సుప్రీంకోర్టు ఒక కీలక కేసులో ప్రభుత్వం తరఫున తీర్పు ఇస్తూ, నైతిక దుష్ప్రవర్తన (Moral Turpitude) కిందకు వచ్చే నేరాలకు పాల్పడిన గ్రీన్ కార్డ్ హోల్డర్లపై డిపోర్టేషన్ చర్యలు తీసుకోవచ్చని స్పష్టం చేసింది. గ్రీన్ కార్డ్ కలిగి ఉండటం మాత్రమే దేశంలో శాశ్వతంగా ఉండే హామీ కాదని కోర్టు పేర్కొంది.

ఈ కేసు చైనాకు చెందిన మక్ చోయ్ అనే గ్రీన్ కార్డ్ హోల్డర్‌కు సంబంధించినది. నకిలీ ట్రేడ్‌మార్క్ కేసులో చిక్కుకున్న అనంతరం అమెరికాలోకి తిరిగి ప్రవేశించే సమయంలో ఇమ్మిగ్రేషన్ అధికారులు అతనిని అడ్డుకున్నారు. అనంతరం డిపోర్టేషన్ ప్రక్రియ ప్రారంభమైంది. అయితే తాను చేసిన తప్పు నైతిక దుష్ప్రవర్తన కిందకు రాదని వాదిస్తూ కోర్టును ఆశ్రయించాడు.

చివరకు అమెరికా సుప్రీంకోర్టు ప్రభుత్వం తరఫున తీర్పు ఇస్తూ, నైతిక దుష్ప్రవర్తనకు సంబంధించిన నేరాలకు సంబంధించిన బలమైన ఆధారాలు ఉంటే గ్రీన్ కార్డ్ హోల్డర్లపై కూడా దేశ బహిష్కరణ చర్యలు తీసుకోవచ్చని స్పష్టం చేసింది.

అమెరికా చట్టాల ప్రకారం మోసం, దొంగతనం, నకిలీ పత్రాల వినియోగం, ఆర్థిక మోసాలు, విశ్వాస ఘాతుక చర్యలు, కొన్ని హింసాత్మక నేరాలు నైతిక దుష్ప్రవర్తన పరిధిలోకి రావచ్చు. అయితే సాధారణ ట్రాఫిక్ ఉల్లంఘనలు లేదా చిన్నపాటి జరిమానా కేసులు తప్పనిసరిగా డిపోర్టేషన్‌కు దారితీయవు.

ఈ తీర్పు తరువాత అమెరికాలోకి తిరిగి ప్రవేశించే సమయంలో ఇమ్మిగ్రేషన్ అధికారులు మరింత కఠినంగా వ్యవహరించే అవకాశం ఉందని నిపుణులు చెబుతున్నారు. గతంలో చేసిన నేరాలకు సంబంధించిన రికార్డులు కూడా భవిష్యత్తులో సమస్యలు సృష్టించే అవకాశం ఉంది.

అమెరికాలో ప్రస్తుతం లక్షలాది మంది భారతీయులు గ్రీన్ కార్డ్ హోల్డర్లుగా నివసిస్తున్నారు. వారిలో ఐటీ ఉద్యోగులు, వైద్యులు, వ్యాపారవేత్తలు, విద్యార్థులు ఉన్నారు. ఈ తీర్పు వారందరికీ ఒక హెచ్చరికగా మారింది. పన్ను సంబంధిత తప్పులు, నకిలీ పత్రాల వినియోగం, ఆర్థిక మోసాలు వంటి అంశాల విషయంలో మరింత జాగ్రత్త అవసరమని న్యాయ నిపుణులు సూచిస్తున్నారు.

డొనాల్డ్ ట్రంప్ ప్రభుత్వం చేపట్టిన కఠిన ఇమ్మిగ్రేషన్ విధానాలకు ఈ తీర్పు మద్దతుగా నిలుస్తోందని రాజకీయ విశ్లేషకులు భావిస్తున్నారు. మరోవైపు మానవ హక్కుల సంస్థలు నైతిక దుష్ప్రవర్తన అనే పదానికి మరింత స్పష్టమైన నిర్వచనం అవసరమని అభిప్రాయపడుతున్నాయి.

మొత్తం మీద గ్రీన్ కార్డ్ ఉన్నా చట్టాలకు అతీతం కాదని, అమెరికా చట్టాలను ఉల్లంఘిస్తే తీవ్ర పరిణామాలు ఎదుర్కోవాల్సి ఉంటుందని అమెరికా సుప్రీంకోర్టు తాజా తీర్పు స్పష్టమైన సందేశం ఇస్తోంది.